Ajit Dada,धडाडीचे नेतृत्व, विकासाची दृष्टी अन् जनतेशी नाळ,अजितदादा म्हणजे अजिंक्य पर्व!

संपादकीय/ जितेंद्र जाधव(इंदापूर)

• अनेक नेते राजकारणात येतात आणि जातात; मात्र काही व्यक्तिमत्त्वे अशी असतात की, त्यांच्या जाण्यानंतरही त्यांचे विचार, कार्यशैली आणि जनतेशी असलेले नाते समाजाच्या स्मरणातून कधीच पुसले जात नाही. महाराष्ट्राच्या राजकारणात आपल्या कर्तृत्वाची स्वतंत्र छाप उमटवणारे, प्रशासनावर विलक्षण पकड असलेले आणि सामान्य माणसाच्या प्रश्नांना प्राधान्य देणारे स्वर्गीय अजितदादा पवार हे असेच एक असामान्य नेतृत्व होते.

आज त्यांच्या जयंतीनिमित्त त्यांचे स्मरण करताना मनात अनेक आठवणी दाटून येतात. कठोर निर्णयक्षमता, कामाचा प्रचंड वेग, स्पष्टवक्तेपणा आणि विकासकामांबाबतची असलेली तळमळ ही अजितदादांची ओळख होती. राजकारण हे केवळ सत्तेसाठी नसून जनतेच्या जीवनात सकारात्मक बदल घडविण्याचे माध्यम आहे, हा विचार त्यांनी आपल्या कार्यातून सातत्याने अधोरेखित केला.

महाराष्ट्राच्या विकासात, विशेषतः ग्रामीण भागाच्या प्रश्नांमध्ये अजितदादांनी घेतलेली भूमिका अत्यंत महत्त्वाची होती. शेती, सिंचन, सहकार, शिक्षण, आरोग्य आणि पायाभूत सुविधांच्या विकासासाठी त्यांनी घेतलेले निर्णय आणि केलेले प्रयत्न आजही अनेकांच्या जीवनाला दिशा देत आहेत. पुणे जिल्ह्यासह राज्यातील विविध भागांच्या विकासासाठी त्यांनी केलेले योगदान जनतेच्या मनात कायम स्मरणात राहील.

अजितदादांच्या व्यक्तिमत्त्वाची एक विशेष बाजू म्हणजे त्यांची जनतेशी असलेली थेट नाळ. सामान्य कार्यकर्त्यापासून ते प्रशासनातील वरिष्ठ अधिकाऱ्यांपर्यंत प्रत्येकाशी कामाच्या मुद्द्यावर थेट संवाद साधण्याची त्यांची शैली होती. त्यांच्या स्पष्टवक्तेपणामुळे अनेकदा त्यांच्यावर टीकाही झाली; मात्र त्यांच्या मनात विकासकामांबाबत असलेली प्रामाणिकता आणि निर्णयक्षमता याबाबत त्यांच्या समर्थकांसह विरोधकांनाही आदर होता.

आजच्या राजकारणात विचारांपेक्षा आरोप-प्रत्यारोपांना अधिक महत्त्व मिळत असताना अजितदादांच्या कार्यशैलीची आठवण अधिक प्रकर्षाने होते. विकासासाठी कठोर निर्णय घेण्याची तयारी, प्रशासनाला कामाला लावण्याची क्षमता आणि जनतेच्या प्रश्नांवर तातडीने निर्णय घेण्याची वृत्ती ही त्यांच्या नेतृत्वाची खरी ताकद होती.

त्यांच्या जाण्याने निर्माण झालेली पोकळी कधीही भरून निघणारी नाही. मात्र त्यांच्या विचारांचा, कार्याचा आणि विकासाच्या दृष्टिकोनाचा वारसा पुढे नेणे हीच त्यांना खरी आदरांजली ठरेल. त्यांच्या कार्यातून प्रेरणा घेऊन समाजाच्या शेवटच्या घटकापर्यंत विकास पोहोचविणे, शेतकरी, कष्टकरी, विद्यार्थी आणि सर्वसामान्य जनतेच्या प्रश्नांसाठी संवेदनशील राहणे, हाच अजितदादांच्या स्मृतींना योग्य मानाचा मुजरा ठरेल.

अजितदादा आज आपल्यात नसले तरी त्यांचे कार्य, त्यांची धडाडी आणि जनतेच्या मनातील त्यांचे स्थान कायम आहे.