इंदापूर,दि.३
- इंदापूर विधानसभा मतदार संघाकडे संपूर्ण राज्याचे लक्ष लागून राहिले आहे. इंदापूर विधानसभेची लढाई राष्ट्रवादी अजित पवार गटाचे दत्तात्रय भरणे विरुद्ध राष्ट्रवादी काँग्रेस शरदचंद्र पवार पक्षाचे हर्षवर्धन पाटील यांच्यामध्ये अटीतटीची लढत सुरू असताना आज अचानक राष्ट्रवादी काँग्रेस शरदचंद्रजी पवार पक्षाचे प्रमुख खा.शरद पवार हे इंदापूर तालुक्याच्या दौऱ्यावरती येत आहेत.खा.शरद पवार यांच्या इंदापूर दौऱ्यामुळे इंदापूर तालुक्यात राजकीय घडामोडींना प्रचंड वेग आला असून संपूर्ण जिल्ह्याचे लक्ष आजच्या होणाऱ्या खा. शरद पवार यांच्या दौऱ्याकडे लागून राहिले आहेत.
राष्ट्रवादी काँग्रेसमध्ये फूट पडल्याने खा शरद पवार हे इंदापूर विधानसभा निवडणुकीसाठी अधिक सक्रिय झाल्याचे दिसून येत असून ते आज इंदापूर तालुक्यातील अनेक राजकीय नेत्यांच्या भेटीगाठी घेणार असल्याची माहिती विश्वसनीय सूत्रांनी दिली.
खा शरद पवार यांच्या भेटी नंतर इंदापुरात राष्ट्रवादी ( sp) पक्षा अंतर्गत असणारे मतभेद संपुष्टात येणार असल्याची चर्चा आहे. काही दिवसापासून अलिप्त असलेले नेते येणाऱ्या दिवसात माजी मंत्री हर्षवर्धन पाटील यांच्या प्रचारात सक्रिय होणार असल्याचे सांगण्यात येत आहे.
काहीही करून इंदापुरात राष्ट्रवादी काँग्रेस शरदचंद्र पवार पक्षाचे उमेदवार माजी मंत्री हर्षवर्धन पाटील यांना विजयी करून, इंदापूर सह बारामती लोकसभा मतदारसंघ व पुणे जिल्हा हा शरद पवारांचा बालेकिल्ला आहे असा संदेश राज्यात देण्याच्या उद्देशाने शरद पवार मैदानात उतरले असल्याचे दिसून येत आहे.
